මිහිඳු රජුනි, ඇයි තනියම වෙල මැද්දේ

මිහිඳු රජුනි, ඇයි තනියම වෙල මැද්දේ

5 September 2018 06:01 pm
මහින්ද සේනාව අද (05) කොළඹට ආවේ කොළඹ වැටලීමටයි. ඒ සඳහා ඔවුහු දින ගණනාවක සිට සැළසුම් සකස් කළහ.
වෙනකක් තබා විරෝධතාවය පවත්වන ස්ථානය පවා අවසන් මොහොත දක්වා රහසක් ලෙස තබා ගැනීමට ඔවුහු සමත් වූහ. බලාපොරොත්තු වූයේ කොළඹ දක්වා දිවෙන සියලු මාර්ග අවහිර කරමින් පා ගමනින් කොළඹට පැමිණීමටයි.
 
එහෙත් අවසානයේ මහින්ද සේනාවට හැකි වූයේ යන්තමින් ලේක්හවුස් වටරවුම වැටලීමට පමණි.
 
පැරදී ගෙදර ගියද, මහින්ද සේනාව තමන්ගේ සර්වකාලීන ජනාධිපතිවරයා ලෙස සලකන මහින්ද රාජපක්ෂ මහතා ජනතාව අමතන්නට පටන් ගත්තේ ඇඳිරි වැටීමෙනුත් පසුවයි. අවාසනාවක මහත, ඒ වනවිටත් මහින්ද සේනාවේ බහුතරයක් සිටියේ ගම්බිම් බලා ගමන් කරමිනි. දකුණු ලකේ සිට පැමිණි බොහෝ දෙනා ඒ වනවිටත් දක්ෂිණ අධිවේගී මාර්ගයට පිවිස අවසන්ය.
 
අවසානයේ මහින්ද රාජපක්ෂ මහතාට අමතන්නට සිදු වූයේ සිය පාක්ෂිකයන් අතලොස්සක් සහ ආරක්ෂාව වෙනුවෙන් කැඳවා සිටි පොලිස් නිළධාරීන් සහ ඒ වනවිටත් ලේක්හවුස් වටරවුමේ රැඳී සිටී මාධ්‍යවේදීන් අමතා කතා කිරීමටයි.
 
වෙනදා මහින්ද රාජපක්ෂ ජනතාව අමතන විට ඔහු ලඟින්ම සිටින බොහෝ නායකයන් අද ඔහු සමීපයේ නැත.
 
2015 පරාජයෙන් පසු හැමදාමත් ඔහු සමග සිටි කුමාර වෙල්ගම අහලකවත් නැත. ප්‍රසන්න රණතුංගලා, බන්ධුල ගුණවර්ධනලා, එස්.බී.ලා, සුසිල්ලා ද නැත. පොදුජන පෙරමුණේ සභාපති ජී.ඇල් ද නැත. වෙනෙකක් තබා විරෝධතාවයට සහභාගි වූ ඩලස්, පවිත්‍රා වැන්නන්ද මහින්ද ජනතාව අමතන විට ඔහු සමග නැත. ඒකාබද්ධයේ සෙසු නායකයන් වන දිනේෂ්ලා, වාසුලා, ගම්මන්පිලලා ද නැත.
 
බැසිල් ද නැත, ගෝඨා ද නැත, චමල් ද නැත, නාමල් ද නැත, යෝෂිත ද නැත.
 
කොටින්ම කිවහොත් වෙනදා තරම් ඔහු ඉදිරියේ තිබෙන මීඩියා ආයතනවල මයික්‍රෆෝන් ද නැත.
 
එදා මැදමුලන වලව්වේදී මෙන් 'මහින්ද මහත්තයෝ ගහලා හරි ආණ්ඩුව ගනිමු'යි කියන්නට ද කිසිවෙකු නැත.
 
මේ විරෝධතාවය සංවිධානය කළ සංවිධායකයන්ගේ අඩුපාඩුවක් ද එසේ නැතහොත් මේ යථාර්ථය ද ?
 
මිහිඳු රජුනි ඇයි තනියම වෙල මැද්දේ..................