බැසිල් කලින්ම ආවෙ ඇයි ?

බැසිල් කලින්ම ආවෙ ඇයි ?

26 September 2018 01:13 pm
අධිකරණයේ විශේෂ අවසරයක් මත විදෙස්ගතව සිටි හිටපු අමාත්‍ය බැසිල් රාජපක්ෂ මහතා ඊයේ (25) නැවත දිවයිනට පැමිණියේය. මාස තුනක කාලයක් විදෙස්ගතව සිටීම සඳහා ඔහු අධිකරණයෙන් අවසර ලැබිණි. 
පසුගිය ජූලි මස 16 වැනිදා කොළඹ මහාධිකරණය බැසිල් රාජපක්ෂ මහතාට ලබාදුන් අවසරය අනුව අගෝස්තු මස 10 වැනිදා සිට නොවැම්බර් මස 10 වැනිදා දක්වා ඔහුට විදෙස්ගතව සිටීමේ අවස්ථාව ලැබිණි. ඒ අනුව ඔහුගේ විදෙස් ගමන් බලපත්‍රය රුපියල් ලක්ෂ 02 ක මුදල් ඇප මත නිදහස් කළේය.
 
කෙසේ වෙතත් ඔහු තවත් මාසයකට අධික කාලයක් තිබියදී නැවත ලංකාවට පැමිණ ඇති අතර බැසිල් ප්‍රකාශ කර ඇත්තේ හිටපු ජනාධිපති මහින්ද රාජපක්ෂ මහතාගේ නායකත්වයෙන් ගෙනයන ආණ්ඩුව පෙරළීමේ අරගලයට සහාය දැක්වීම සඳහා තමන් වේලාසන නැවත පැමිණි බවයි. රාජපක්ෂලාට හිතවත් වෙබ් අඩවි ඇතුළු මාධ්‍ය ද ඒ බව පුන පුනා ප්‍රචාරය කරමින් සිටී.
 
එතකොට ජනබලය කොළඹට ?
 
මහින්දලාගේ අරගලයට සහාය දැක්වීමට සැබෑ වුවමනාවක් ඔහුට ඇත්නම් නාමල් රාජපක්ෂලා මහා ඉහළින් සංවිධානගත වෙමින් පසුගිය සැප්තැම්බර් 05 වැනිදා සිදුකළ කොළඹ වැටලීමේ විරෝධතාවය මගහැර සිටියේ ඇයි ? බැසිල් ඒ සඳහා සහාය දැක්වීමෙන් වැලකී සිටියා පමණක් නොව, ඔහුට හිතවත් මන්ත්‍රීවරුන් ලවා එම විරෝධතාවය කඩාකප්පල් කිරීමට ද කටයුතු කළේය. ඒ බව එළිපිටම දක්නට ලැබුණු අතර බැසිල්ට හිතවත් මන්ත්‍රීවරුන් කිසිවෙකුත් විරෝධතාවය අවස්ථාවේ හෝ සක්‍රීය දායකත්වයක් නොදැක්වීය.
 
එසේ කටයුතු කළ බැසිල් අද 'මහින්දගේ නායකත්වයෙන් ගෙනයන ආණ්ඩු විරෝධී ව්‍යාපාරයට සහාය දැක්වීම සඳහා' කලින්ම පැමිණියා යැයි කීම විහිළුවකි.
 
ඇත්ත කතාව නම් බැසිල් හදිසියේ ආවේ ඔහු ඇතුළු රාජපක්ෂලාට විරුද්ධව ගොනුකර ඇති නඩු ගොන්න හේතුවෙනි. මේ වනවිට පළමු විශේෂ මහාධිකරණයේ කටයුතු ආරම්භ වී ඇති අතර එහි දෙවැනි නඩුව ගොනුකර ඇත්තේ ගෝඨාභයට එරෙහිවයි. ඊට අමතරව බැසිල්ට නඩු කිහිපයක් ඇති අතර නාමල් ඇතුළු රාජපක්ෂලා විසින් පසුගිය පාලන සමයේදී සිදුකළ දූෂණ-වංචා, කොමිස් ගැහිලි, රාජ්‍ය දේපල අවභාවිතය ඇතුලු චෝදනා රැසක් සම්බන්ධයෙන් නඩු පවරා තිබේ. බැසිල් හදිසියේ නැවත පැමිණීමේ සැබෑ හේතුව මෙයයි.