FCIDයේ ඉහළ පුටු මාරුවක්

FCIDයේ ඉහළ පුටු මාරුවක්

12 April 2019 09:56 am

පොලිස් මූල්‍ය අපරාධ විමර්ශන කොට්ඨාශයේ (FCID) ඉහළ නිලධාරීන් රැසකට ස්ථාන මාරු ලබාදීමට නියමිතව ඇති බව වාර්තා වේ.

 

FCIDය මඟින් විමර්ශනය කෙරෙන මූල්‍ය වංචාවලට අදාළ චූදිතයින් සමඟ සමීප සබඳතා පැවැත්වීම මත ඔවුන් මාරු කර යැවීමට සිදුව ඇති බවයි ආරංචිමාර්ග සඳහන් කරන්නේ.

ජ්‍යේෂ්ඨ නියෝජ්‍ය පොලිස්පති රවී සෙනවිරත්න මහතා FCID ප්‍රධානියා ලෙස පත්වීමෙන් අනතුරුව එතෙක් එම ආයතනය සමඟ ඩීල් දමමින් සිටි බොහෝ පාර්ශ්ව මහත් කලබලයට පත්ව තිබිණි. ඒ, රවී සෙනවිරත්න යනු පොලිසිය තුළ සිටින ඩීල් දැමිය නොහැකි අවංක නිලධාරියකු බව සියල්ලන්ම දන්නා නිසාය. ඔවුන්, තමන් සමඟ පෙරසිට සම්බන්ධතා පැවැත් වූ FCID ඉහළ නිලධාරීන් අමතා මේ පිළිබඳව විමසීමේදී අදාළ නිලධාරීන් ප්‍රකාශ කර ඇත්තේ "ලොක්කො මාරු වුණාට අපිනෙ පරීක්ෂණ කරන්නෙ. අපි වැඩේ බලාගන්නම්" යනුවෙනි.

මේවා හෙළිදරව් වීමෙන් අනතුරුව අදාළ නිලධාරීන් වෙනත් අංශ කරා මාරු කර යැවීමට බලධාරීන් තීරණය කර ඇත.