නව ව්‍යවස්ථාවේ විද්වත් කමිටු වාර්තාව: බුදුදහමට හෝ රටේ ඒකීයභාවයට හානියක් නැහැ

නව ව්‍යවස්ථාවේ විද්වත් කමිටු වාර්තාව: බුදුදහමට හෝ රටේ ඒකීයභාවයට හානියක් නැහැ

11 January 2019 08:27 am

යෝජිත නව ව්‍යවස්ථාවෙන් බුදු දහමට ඇති ප්‍රමුඛස්ථානයට හෝ රටේ ඒකීයභාවයට කිසිදු හානියක් සිදු නොවන බව අග්‍රාමාත්‍ය රනිල් වික්‍රමසිංහ මහතා ප්‍රකාශ කළේය.

නව ව්‍යවස්ථාව සම්බන්ධයෙන් විද්වත් කමිටු වාර්තාව අද ව්‍යවස්ථා මණ්ඩලයට ඉදිරිපත් කරමින් වික්‍රමසිංහ මහතා මේ බව කියා සිටියේය.

දේශපාලන වශයෙන් බංකොලොත් වූ ඇතැමුන් වැරදි මතවාද සමාජගත කිරීමට උත්සහ දරන බව වික්‍රමසිංහ මහතා පෙන්වාදුන්නේය.

ඒ අනුව කිසිම අවස්ථාවක රට බෙදීමට අවශ්‍යතාවක් නොමැති බවයි ඔහු අවධාරණය කළේ.

ඒකීය රාජ්‍යයක් තුළ පළාත් සභාවලට බලය ලබා දීම කෙසේ කරන්නේද යන්න සාකච්ජා කළ හැකි බවද අගමැතිවරයා සඳහන් කළේය.

"පසුගිය කාලයේ රට බෙදනවා කිව්වා. ඒකීයභාවය නැති කරන්න හදනවා කිව්වා. උතුරු නැගෙනහිර එකතු කරන්න හදනවා කිව්වා. ඒ කිසිම දෙයක් මෙහි නැති බව මේක කියෙව්වාම තේරෙනවා."

මේ අතර විධායක ජනාධිපති ධූරය අහෝසි කිරීමද ප්‍රධාන කාරණයක් බව රනිල් වික්‍රමසිංහ මහතා පැවසුවේය.

මෙහිදී අදහස් දක්වමින් විපක්ෂ නායක මහින්ද රාජපක්ෂ මහතා පැවසුවේ එක ජාතියක් තරහකර ගනිමින් තවත් කොටසකට පමණක් අයිතිවාසිකම් ලබාගැනීමට කටයුතු කිරීමෙන් ඇතිවන්නේ වෛරයක් බවත් එවැනි තත්ත්වයක් ඇතිකිරීමෙන් වලකින ලෙසයි.

ඊට පිළිතුරු දෙමින් අගමැතිවරයා කියා සිටියේ මහින්ද රාජපක්ෂ මහතාගේ එම යෝජනාවට එකඟ වන අතර ඒ සම්බන්ධයෙන් විවාදයක් ආරම්භ කළ හැකි බවයි.