පාඨලී, උතුර ගැන කතාව වෙනස් කරයි (VIDEO)

පාඨලී, උතුර ගැන කතාව වෙනස් කරයි (VIDEO)

11 January 2019 01:00 pm

මතුව තිබෙන දේශගුණික විපර්යාස හමුවේ දරුණුම පීඩාව එල්ල වන්නේ උතුරු ප්‍රදේශයට වන හෙයින් ඊට මුහුණ දීමට හැකි ශක්තිමත් වැඩපිළිවෙළක් සකස් කරගත යුතු බව මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතා ප්‍රකාශ කළේය.

අමාත්‍යවරයා මේ බව සඳහන් කළේ අද (11) නව ව්‍යවස්ථාව සම්බන්ධයෙන් විද්වත් කමිටු වාර්තාව ව්‍යවස්ථා මණ්ඩලයට ඉදිරිපත් කළ අවස්ථාවේදී එම විවාදයට එක්වෙමිනි.

මනෝරාජික සිහිනවලින් මිදී ප්‍රායෝගිකව ක්‍රියා කළ යුතු බවයි රණවක මහතා කියා සිටියේ.

රට ගොඩනැගීම සඳහා දැන්වත් විද්‍යානුකූල ආණ්ඩුකරණයක්, තිරසර සංවර්ධන මූලධර්ම සහ කුසලතාවලට රැකියා ලැබෙන ක්‍රමයක් අවශ්‍ය බව හෙතෙම පෙන්වා දුන්නේය.

ඇතැම් කාරණා ආණ්ඩුක්‍රම ව්‍යවස්ථාවෙන් කළ නොහැකි අතර විශේෂයෙන් උතුරු ප්‍රදේශය නියෝජනය කරන දේශපාලන පක්ෂ ප්‍රධාන ධාරාවට එකතු වී අහිමි වූ, නොලැබුණු සංවර්ධනය අත්පත්කරගැනීම සඳහා වසර 10ක් එකට එක්ව පාලනය ගෙන යාමට ආරාධනා කරන බවද පාඨලී චම්පික රණවක මහතා සඳහන් කළේය.

එවැනි ආණ්ඩුවකට ගමන් කිරීමෙන් කිසිම ආකාරයකින් සංස්කෘතික අනන්‍යතාවේ වෙනසක් නොවන බව අමාත්‍යවරයා වැඩිදුරටත් පැවසීය.