විදුලි කප්පාදුව ගැන ප්‍රචාරය වන කාලසටහන බොරුවක් - ලේකම්

විදුලි කප්පාදුව ගැන ප්‍රචාරය වන කාලසටහන බොරුවක් - ලේකම්

24 March 2019 07:06 am

ඉදිරි දින 10ක පමණ කාලයක විදුලි කප්පාදුවක් ක්‍රියාත්මක වන බවට ප්‍රචාරය වී ඇති පුවත අසත්‍යයක් බව විදුලිබල, බලශක්ති සහ ව්‍යාපාර සංවර්ධන අමාත්‍යාංශ ලේකම් ආචාර්ය සුරේන් බටගොඩ මහතා පවසයි.

 විදුලි කප්පාදුවක් සඳහා ලංකා විදුලි බල මණ්ඩලය විසින් ඉල්ලීමක් කර ඇතත් අමාත්‍යාංශය එය මෙතෙක් අනුමත කර නැති බවයි ලේකම්වරයා සඳහන් කරන්නේ.

පවත්නා වියළි නියං කාලගුණික තත්ත්වය නිසා ඉල්ලුම සහ සැපයුම අතර පවත්නා පරතරය අවම කර ගන්නා ලෙස ලංකා විදුලි බල මණ්ඩලයට උපදෙස් දී ඇති බවයි බටගොඩ මහතා කියාසිටින්නේ.

විදුලි කප්පාදුවක් නොකර කෙසේ හෝ පවත්වා ගෙන යාමට උත්සහ කරන අතර ඊට මහජනතාවගේ සහය අවශ්‍ය බව හෙතෙම පෙන්වාදෙයි.

" අපි උත්සහ කරන්නේ විදුලිය කප්පාදුවක් නොකර කෙසේ හෝ පවත්වාගෙන යන්න. කර්මාන්තකරුවන් සමඟ සාකච්ජා කර ඔවුන්ගේ ජෙනරේටර් භාවිතය වැඩියෙන් යොදාගන්නා ලෙසත් ඉල්ලීමක් කරනවා. ඒ වගේම නගර සභාවලට දැනුම් දී තිබෙනවා වීදී ලාම්පු යම් ප්‍රමාණයකින් නිවාදමන්න කටයුතු කරන ලෙස. නිවෙස්වලත් විදුලි බල්බ් දෙකක්වත් නිවාදැමීමට කටයුතු කරන ලෙස ඉල්ලසිටිනවා."

ඉදිරි දින 15ක පමණ කාලයක් මෙම අර්බුදය පවතින අතර පසුව සාමාන්‍ය තත්ත්වයට පත්වන බවයි ලේකම්වරයා සඳහන් කරන්නේ.

මහවැලි ජලාශවල ජල මට්ටම පහළ බැසීම නිසා එම ජලාශවල ජල විදුලිය නිෂ්පාදනය නතර කර ඇති බවද ඔහු කියාසිටියි.

කෙසේවෙතත් පවත්නා විදුලිය අර්බුදය නිසා කප්පාදුවක් කිරීමට අවශ්‍යද නැද්ද යන්න පිළිබඳව හෙට පැවත්වෙන සාකච්ජාවේදී තීරණයක් ගන්න බවයි බටගොඩ මහතා පවසන්නේ.

විදුලි කප්පාදුවක් සම්බන්ධයෙන් මේ වන විටත් ප්‍රචාරය වන්නේ අසත්‍ය තොරතුරක් වන අතර එය 2002 වසරේ සකස් කළ කාලසටහනක් බවයි ඔහු වැඩිදුරටත් අවධාරණය කරන්නේ.

ASK