තට්ටු ගොඩනැගිලි
අතරින් එබේ සඳ
හෙට පෝයට
විච්චූරණ ආලවට්ටම් සහිතව
" ...කොච්චරක් නං පෝයවල් පහු උනාද
ඒත් දරන්ඩම බැරි හීතල ගේන්නෙ ඉල් හඳ.. "
දෙඅත පොරවමින්
කවුළුව අසල සිටින
ඔබේ නෙත් වැසුනු
උපැසියෙන් පෙනේ
එක හා සමාන චන්ද්‍රයන් දෙදෙනෙක්
"..හඳ නාකි නෑ බිඳුවක්
හොර හොරෙන් රෝස් පවුඩර් ගානවා ඇති.. "
ඉවතට හැරී කියයි ඔබ
මිරිකා හරිමින් තවදුරටත්
රැළි වැටෙන දෙනයන
ඉන්පසුව ඔබ
ලේබල කියවමින් තෝරයි
පෙර මධුපාන ඔඩම තිබූ තැන
අක්‍රමවත්ව තබා ඇති
බෙහෙත් බෝතල
ගොන්නෙන් එකක්
එකින් එක බෝතල සෙලවී
මොහොතකට මැවේ
මිහිරි මෘදු නාදයක්
ප්‍රේමිය
හඳ නැවතිල්ලේ සිටින විට
ගලා යන කාලයෙන් මඬින ලද
අප කුඩා
කුහුඹුවන් දෙදෙනෙක්..... !!
