ජනාධිපති කොමිසම මාව නිදොස් කොට නිදහස් කළා - ජනාධිපති රාජිතටයි චම්පිකටයි බයයි

ජනාධිපති කොමිසම මාව නිදොස් කොට නිදහස් කළා - ජනාධිපති රාජිතටයි චම්පිකටයි බයයි

21 October 2018 06:19 am

ගොඩබිම ආරක්ෂක සේවාවක් ලෙස ආරම්භ කර ජාත්‍යන්තර සමුද්‍ර ආරක්ෂක සේවාවක් ලෙස පුළුල් වූ ඇවන්ගාඩ් සමාගම ආරක්ෂක සේවා සපයන්නෙක් ලෙස ජාත්‍යන්තරව ප්‍රසිද්ධියට පත්වූ දේශීය සාමාගමකි.

ඒ අනුව ඇවන්ගාඩ් සමාගමත් එහි නිර්මාතෘ සභාපති විශ්‍රාමික හමුදා නිලධාරී මේජර් නිශ්ශංක සේනාධිපති පිළිබඳවද විවිධාකාරයෙන් සංවාද මතු විය.

2015 වසරේදී සිදුවූ දේශපාලන පෙරළියත් සමඟ ඇවන්ගාඩ් සමාගම නීත්‍යානුකූල නොවන සමාගමක් ලෙස පෙන්වදෙමින් එය නාවික හමුදාභාරයට පත් කෙරිණි. වසර දෙකහමාරක පමණ කාලයක් තුළ ඉතා වේගයෙන් දියුණු වූ මෙම සමාගම නාවික හමුදාභාරයට පත්වීමත් සමඟ එක රැයින් කඩා වැටෙන්නට පටන් ගත් බව සේනාධිපති මහතා සඳහන් කරයි.

ව්‍යාපාරික ඥානයක් නොමැති නාවික හමුදාව හා කොමිස් දේශපාලන පිල්ලිත් හේතුවෙන් ඇවන්ගාඩ් ව්‍යාපාරයට අද එවැනි තත්ත්වයක් මතුව ඇති බවයි ඔහු සඳහන් කරන්නේ. වසර දෙකහමාරක පමණ කාලයක් තුළ ඇවන්ගාඩ් සමාගම රුපියල් බිලියන 11ක් උත්පාදනය කළ අතර ඉන් රුපියල් බිලියන 4ක් රජයට ආදායම් ලෙස ගෙවා තිබේ. එහෙත් නාවික හමුදාවට පවරා ගැනීමත් සමඟ එක රැයින් රුපියල් මිලියන 170ක් පමණ රජයට පාඩු වූ බව නිශ්ශංක සේනාධිපති මහතා පෙන්වා දෙයි.

මේ අතර ඇවන්ගාඩ් සමාගම පිළිබඳ විමර්ශනය කිරීම සඳහා ජනාධිපති විමර්ශන කොමිසමක් පත්කළ අතර මේ වන විට එහි නිර්දේශ එළිදක්වා තිබේ. එම නිර්දේශයන්ට අනුව ඇවන්ගාඩ් සමාගම ජාතික ආර්ථිකයට විශාල දායකත්වයක් දක්වා ඇති අතර සැලකිය යුතු රැකියා ප්‍රමාණයක් උත්පාදනය කර ඇති බවද තහවුරු කර තිබේ.

ඒ අනුව නිශ්ශංක සේනාධිපතිගේ මෙහෙයුම සාර්ථක වී ඇති බවට කොමිසමද තහවුරුවක් ලබා දී අවසන්ය.

මෙවැනි පසුබිමක් මත අනාගතයේදී එහි මෙහෙයුම කෙබඳු තැනකට පත්වේද? නීත්‍යානුකූල නොවන සමාගමක් ලෙස පවසා රජයට පවරාගැනීමෙන් අනතුරුව දැන් එය එසේ නොවන බව ජනාධිපති කොමිසමේ නිර්දේශවලින්ම පෙන්වා දී තිබේ. එහෙයින් පැවති ඇවන්ගාඩ් සමාගම හා දැන් එය ස්ථාන ගතවී තිබෙන තැන කෙබඳුද? මෙකි කාරණා සම්බන්ධයෙන් අපි ඇවන්ගාඩ් නිර්මාතෘ විශ්‍රාමික මේජර් නිශ්ශංක සේනාධිපති මහතා සමඟ සාකච්ජා කළෙමු.

නාවික හමුදාවට ව්‍යාපාරික ඥානය නැහැ

මෙම සමාගම නාවික හමුදාවට පවරා ගැනීමේදී ප්‍රධාන තර්කය ලෙස ඉදිරිපත් වූ නීත්‍යානුකූල නොවීම තර්කයක් ලෙසම අසමත් වී ඇත්තේ නීත්‍යානුකූල නොවන බව කියූ නෞකා තුළම රජයේ අවි ගබඩා කිරීමය. එය බොහොම අපූරුවට නිශ්ශංක සේනාධිපති මහතා පෙන්වා දෙයි.

 

මම ගෙනාපු ගාණෙන් 25%ක් වත් නාවික හමුදාවට ගෙන්න බැහැ

තමන් යටතේ පැවතියදී මෙහෙයුම් 800ක් සිදුකර තිබූ අතර එය මේ වන විට මෙහෙයුම් 300ක් දක්වා නාවික හමුදාව අඩුකර ගෙන ඇති අතර ඒ අනුව නාවික හමුදාව පෙර පැවති ආදායමෙන් 25% වත් උපයා ගැනීමට නොහැකි වී සිටින බව සේනාධිපති මහතා පෙන්වා දෙයි.

එවැනි තත්ත්වයකට පත්වවීමට පාදක වී ඇති හේතුව ලෙස ඔහු පෙන්වා දෙන්නේ ව්‍යාපාරය තුළ කොමිස් ගැසීමය.

ජනාධිපතිවරයා රාජිතටයි, චම්පිකටයි බයයි

"කනකොට කබරගොයා නෙවෙයි ඌරත් තලගොයා කරන සිස්ටම් එකක් මේ ආණ්ඩුවට තියෙන්නේ. මම දන්නේ නැහැ මේ ආණ්ඩුව රාජිත සේනාරත්නටයි, චම්පිකටයි මෙච්චර බය ඇයි කියලා. ජනාධිපතිවරයට වුනත් තිබුණා මට කෙළින් කතා කරන්න."

මට කියන්න දෙයක් නැහැ ජනාධිපති කොමිසම කියන්න ඕනේ දේ කියල තියෙන්නේ

කෙසේවෙතත් මේ වන විට ජනාධිපති විමර්ශන කොමිසම හරහා ඇවන්ගාඩ් සමාගම ජාතික ආර්ථිකයට කර ඇති සේවාව පිළිගැනීමකට ලක් කර තිබේ.

ඒ අනුව රජයක් ක්‍රියා කළ යුත්තේ එවැනි සමාගමක් ආරක්ෂා කර තවදුරටත් ඔසවා තැබීමට මැදිහත්වීම බව ඔහු අවධාරණය කරයි. කුමන තත්ත්වයක් යටතේ වුවද දේශපාලකයන්ට රට අවශ්‍ය නොවුනත් තමන්ට මෙන්ම අනාගත පරපුර වෙනුවෙනුත්
රට සුරක්ෂිත විය යුතු බව ඇවන්ගාඩ් නිර්මාතෘ සඳහන් කරයි. තමන් තවදුරටත් වෙහෙසෙන්නේ ඒ වෙනුවෙන් බව ඔහු වැඩිදුරටත් කියා සිටියි.

ව්‍යාපාරයකට ව්‍යාපාරික නිදහස් තිබිය යුතු අතර ශ්‍රී ලංකාව වැනි රටක කුමන ව්‍යාපාරයට වුවද දේශපාලන ඇල්ම බැල්ම වැටීම මහ අමුතු දෙයක් නොවෙයි. දේශපාලන වුවමනාවලින් බැහැරව ආර්ථික ප්‍රගමනය වෙනුවෙන් ඔවුන් ඊට මැදිහත් වීමේ වරදක් නොවෙයි. රටේ රජයක් මැදිහත් විය යුත්තේ එවැනි තැනකින් මිස පෞද්ගලික දේශපාලන න්‍යාය පත්‍ර ජයග්‍රහණය කරවීම වෙනුවෙන් ජාතික ආර්ථික පාවා දිය යුතු නැත. එහෙත් මේ රටේ දිගින් දිගටම සිදු වූයේ එයයි. ඇවන්ගාඩ් පෙන්නුම් කර දී ඇත්තේද එම සත්‍යයි.

ආශිකා බ්‍රාහ්මණ / නිශාන්ත ප්‍රියදර්ශන

(නිශ්ශංක සේනාධිපති ඊළඟට සැරසෙන්නේ කුමකටද? තවත් කොටසක් බලාපොරොත්තු වන්න)